حقوق الحيا

[poem=font=",6,,normal,normal" bkcolor="transparent" bkimage="" border="none,4," type=2 line=0 align=center use=ex num="0,black""]
تحدر من المنشا مزون الهماليل=تسوقه هبوبٍ خيرها في مهدها
تراكم علي سجده وذكر وتهاليل=وركز علي دارن خيالي عمدها
تخيله من المغرب عيون الرجاجيل=يبشر بها اللي في عيونه شهدها
غشها ظلام الليل قبل التعاليل=وضفت نجوم الليل وقبل سعدها
حقوق الحـيا يثلج صدور الحلاحيل=وتفرح نفوسٍ طيبها في جسدها
تفيض الشعاب وينحدر صافي السيل=وتنبت مرابيع الحـيا في وعدها
يحل الربيع ويفرحون المشاكيل=وتخضر ديارن عزها في بلدها
نشوف النجوم ونفرق الجدي وسهيل=وبعض النجوم تغيب محدن رصدها
نسوق المثايل والمعاني تماثيل=ونصرف ذهب والطيبه من وجدها
يسج الفكر احيان مع وافي الكيل=ونسرح مع اللي كلمته يعتمدها
تهيض المشاعر يم راعي المعاميل=ونضحك مع العالم ونخفي رمدها
حنين الضماير مات وقت المداهيل=عليه السلام ان كان روحي نشدها
بقي الحي يوفي في جميع التفاصيل=يعز البيوت اللي يثبت عمدها
ترا زلت الفاهم عليها مداخيل=تثبت عليه الكلمه اللي جحدها
هواء النفس قشرا والمشاعر تهاويل=وخير النفوس اللي تميز رشدها
علي غرت العاقل تدور البهاذيل=يقض النظر عن عقدتٍ ماعقدها
حشمنا العرب عن هرجه القال والقيل=وعفنا العلوم اللي تكاثر نكدها
زرعنا علي وجه البسيطه محاصيل=وحصدنا العلوم الغانمه من مددها
نسوق المعاني مثل سوق الفناجيل=وننظم بيوتٍ خاسرن من نقدها
كديش المهار يعوفها راعي الخيل=لو ان الاصايل بالاصابع عددها
كتبنا البيوت اللي تهيض المراسيل=وشفنا المعاني ثابته في سندها
سمعنا عن اللي غره الحط والشيل=وشفنا النفوس اللي تخون ابعهدها
تدور الدواير فوق روس المهابيل=وتقفي نفوسٍ خيب الله جهدها
تسوات وجيه الشر مع بارد الحيل=وشفنا ضعيفن نعمته ماحمدها
تبين الحقيقه لانجلا تالي الليل=ونعرف من الكذاب واللي سردها
يخلد جزيل الشعر من جيل للجيل=وبعض العلوم العوج ندبل كبدها
ترا الحق واضح والليالي مقابيل=وسر النفوس الحاقده في لحدها
وتم الكلام اطيب من البن والهيل= لو ان الدلال الصفر يبري ضمدها
[/poem]

صح لسانك وبيض الله وجهك على القصيدة الجزلة

وبانتظار جديدك

صح لسانك ياعواد
وبانتظار جديدك

صح لسانك يالشاعر عواد
قصيدة رائعه وجزله وبانتظار جديدك

صح لسانك أخوي الشاعر عواد
وبيض الله وجهك على القصيدة الاكثر من رائعه

بيض الله وجيهكم علي الكلام الجميل الذي يثلج الصدر

لاهنتو جميع

صح لسانك...

صح للسانك وطال عمرك واعتلاشانك
ابداع الجزاله في سطورشعرك ومعناه