قـال: الـرشيدي مـن بني ( عبس ) .

:::::::: الـقـصـيدة الـعـبـسية ::::::::


قـال: الـرشيدي مـن بني ( عبس ) .

[poem=font=",5,,normal,normal" bkcolor="transparent" bkimage="" border="none,4," type=0 line=0 align=center use=ex num="0,black""]

قال الرشيدي من بني عبس مجناه = والفارس اللي من بني عبس جدّه
عنتر الياولت على السيف يمناه = يمضي بدربه مايجي من يردّه
ياما زرع الرّعب والخوف بأعداه = وياما حرم خصمه عن الزاد لدّه
هذي فعول الجد نذكر سواياه = افعالنا من منهجه مستمدّه
حنّا ترانا لآبة اللي ذكرناه = غصبٍ على العدوان لو ماتودّه
عدونا في كل ميدان ننصاه = حتى الجبل من فوق راسه نهدّه
وعدونا دايم بالأقدام ناطاه = وصدره بسيف الهند حنا نقدّه
نسقيه سم العلقم اللي طحنّاه = يشرب مرارتها ونوصله حدّه
ناسم على كبده من النار عرقاه = حتى يعاف النوم فوق المخدّه
يعاف حلو النوم لو كان يبغاه = يسهر طوال الليل مانام خدّه
ودخيلنا لامن وصلنا حميناه = اللي يبيه بكل قوّه نصدّه
والضيف نعرف واجبه مانسيناه = له كل غالي بالكرامه نمدّه
الضيف له حشمه وتقدير يالقاه = حتى يروح بدربه اللي يودّه
والجار محشومٍ ونرفع سجاياه = له عندنا قيمه وقدر ومودّه
نستر عيوب الجار بالعين نرفاه = وان غاب حنّا باللوازم نسدّه
وخوينا لو زل ندمح خطاياه = خوينا منَّا وفينا نعدّه
ولا نفتح الباب اللذي فيه ماذاه = بابٍ فتح للشر نسعى لسدّه
وترى البحر غصناه والدّر جبناه = البحر نعرف كل جزره ومدّه
وراع الفعول الطيّبه ماجحدناه = الفارس المعروف حق(ن) نعدّه
والعدل ( حكمه ) في طريق المساواه = ومن ما ( عدل مبناه ) بالظلم هدّه
وكل القبائل بالشجاعه مسمّاه = وكلٍ رجوعه يم ساسه وبدّه
واليوم ذئب الضان ماياكل الشاه = خذ الخبر مني وهاته ودّه
الذئب هذا اليوم مانسمع اعواه = كلٍ يفصل ثوبه اليوم قدّه
في حكم ابو متعب عسى الله ياقاه = العاهل اللي كلبونا نودّه
حكم بشرع الله والحق مشاه = حلحيل ماينحال والسيف حدّه
دستوره القرآن بإخلاص يقراه = وشريعة الإسلام له مجرهدّه
عبدالله اللي لاومر ماعصيناه = تلقا القبائل بالأمر مستعدّه
لامن زعل نزعل ونرضا على رضاه = ونمشي مطيعينه على كل شدّه
هذا كلام الصدق بأوّله واتلاه = ماقول غير الصدق بأوّل مشدّه
والحمد للي تطلب الناس حسناه = الخالق الرازق جزيلٍ بمدّه
اللي خلق آدم من الطين سواه = جميع مابالكون عارف بعدّه
اللي جعلنا أخوان والشكر لله = أخوان بالإسلام ضدن لضدّه

[/poem]

الشاعر عـبيدالله بـن دعـيع آل عـمير القلادي