هــــــمي جبل لشاعرمســاعد الرشـــيــدي

أمشي وهمي جبل يمشي معي وين أروح
أزريت أشيل الجبل وأزريت لا أفارقه

كل الخطاوي تعب كل الليالي جروح
أرضي هجير وسماي شمسها حارقه

ما غير روح التحدي في عروقي تفوح
قوة صمودي على جور الزمن خارقه

هذا وانا عزتي دايم قبالي تلوح
لين أصبحت في حياتي ميزةٍ فارقة

أرفض شعور الندم وأرفض طمان السفوح
لو كان فيها الحياة غصونها وارقه

مادام فيني نفس يذري وفيني جموح
بابٍ وراه إعتزازي طارقه طارقه

رغم إمتداد التعب عيا يموت الطموح
والشمس بكره رغم أنف الدجى شارقه