معجزة زايد ابن عدله

البارحه حلمي عسى واقعه خير ==مثل السحاب اللي تقافا مخيله
لاحت بروقه في خياله من اعصير == من خلقتي ماشفت برقً مثيله
شمخ مقاديمه اسوات السواطير == سبحان من خلى امزونه ظليله
اليا برق قامت تحن المزابير == واحريت ماها مير ماسال سيله
عسعس عليه الليل واقفى محادير == عده رهاوي مير صافي صميله
روح عليه من الجنوبي شخاتير == واقفى هبوب النود تطرق شليله
زمه سرابً حال دونه مقادير == لين اتقى عن شوف عينً تخيله
انشد وادور لي عطاشا على البير == واقول وين العلم بايى وسيله
ياخذ منه عبره ودرسً وتفكير == قدام لايفرق خليلً خليله
دليل واضح مايبا عنه تفسير == مثل الزناد ان ناش خشم الفتيله
عينً تراعي له بحشمه وتقدير == والعين الاخرى ودها بالفشيله
اضحك واسولف له عن كليب والزير == واقول انا صاحبك راعي طويله
تاهت احلومي بين شرحن وتصوير == واللي عرف واديه يعرف مسيله
ياطير ابن برمان ماشفت لي طير == طيرن غدالي قبل تسعين ليله
الشوف غره والحباري مخامير == واومي بملواحي ولاله عقيله
لفه هواء الغربي بعج ومعاصير == واقفى وانا مالي بفرقاه حيله
ربه عطاه من الوصايف نوادير == اهدف طويل ادقاق كفه جليله
شفي ومقصودي معه ياعرب غير == لو ان حظي ماسرج فيه خيله
ياليت من يذكر لي الطير بالخير== لا اصير انا مجنون والطير ليله
دقت عليه اهجوس صدري مزامير== والارض جردا والسماء مستطيله

يالله حسن الخاتمه والتدابير== ياللي تعز النفس لو هي ذليله